(ភ្នំពេញ)៖ ស្ថានទូតចិនប្រចាំកម្ពុជា តាមរយៈវីដេអូមួយ នៅថ្ងៃទី៣០ ខែមីនា ឆ្នាំ២០២៤ បានអញ្ជើញប្រជាពលរដ្ឋចិនយ៉ាងកក់ក្តៅ ដើម្បីមកកម្សាន្តទស្សនាប្រទេសកម្ពុជា ជាពិសេសប្រាសាទអង្គរវត្ត។
ដំបូង លោក Wang Wentian ឯកអគ្គរដ្ឋទូតចិន បានថ្លែងរំឭកគ្រាដែលសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា អញ្ជើញដើរបញ្ច្រាសទិស ធ្វើទស្សនកិច្ចទៅកាន់ប្រទេសចិន ដើម្បីលើកទឹកចិត្តប្រទេសចិន ក្នុងគ្រាដែលកំពុងផ្ទុះជំងឺកូវីដ១៩។
ជាមួយគ្នានេះ តាមរយៈវីដេអូប្រមាណជាង ១នាទី លោកឯកអគ្គរដ្ឋទូត ក៏បានបង្ហាញពីវប្បធម៌ និងប្រពៃណីដ៏សម្បូរបែបដល់ប្រជាជនចិន។ ក្នុងនោះ លោកថែមទាំងអះអាងថា កម្ពុជាមានស្ថិរភាពក្នុងសង្គម មានសុវត្ថិភាព និងប្រជាជនរាក់ទាក់ ដែលស័ក្តិសមជាកន្លែងដើរកម្សាន្ត។
ក្នុងវីដេអូនេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានសង្ឃឹមថា នឹងមានប្រជាពលរដ្ឋចិនជាច្រើន មកទស្សនាកម្ពុជា នៅឆ្នាំនេះ។ ២០២៤ គឺជាឆ្នាំផ្លាស់ប្តូរប្រជាជន និងប្រជាជន កម្ពុជា-ចិន ហេតុនេះហើយ សម្តេចធិបតី ថ្លែងសា្វគមន៍យ៉ាងកក់ក្តៅដល់ប្រជាជនចិន ឱ្យមកទស្សនាប្រទេសកម្ពុជា៕